Tamén aprobou as bases da convocatoria do V Premio Rodolfo Prada á xestión cultural
Acordouse ademais a adhesión á declaración institucional da FEMP con motivo do Día Internacional da Muller
Ourense, 7 de marzo de 2022.- A Xunta de Goberno da Deputación de Ourense, reunida esta mañá por vía telemática baixo a presidencia do vicepresidente Rosendo Fernández, aprobou a concesión de máis de 300.000 euros en axudas dentro do ámbito da cooperación cos concellos, así como tamén as bases do V Premio Rodolfo Prada á xestión cultural e a adhesión da Deputación á declaración institucional da FEMP con motivo do Día Internacional da Muller.
No capítulo de cooperación cos concellos, as axudas aprobadas foron as seguintes: 100.000 euros ao Concello de Bande para actuacións en materia de servizos sociais; 25.000 euros a favor de Castrelo de Miño para accións de dinamización rural, así como outros 22.000 euros para traballos medioambientais; 35.000 euros a Cortegada para o plan cultural de 2022; case 26.000 euros a Larouco para reparación de vías públicas e mobiliario urbano; 40.000 euros a Monterrei para o convenio do Castelo; e dúas achegas máis a Padrenda de 40.000 e 20.000 euros, respectivamente, para traballos medioambientais e limpeza de vías.
Premio Rodolfo Prada
Segundo as bases do V Premio Rodolfo Prada aprobadas hoxe poderán optar a este galardón persoas profesionais ou afeccionadas, proxectos ou colectivos que se signifiquen pola xestión de iniciativas culturais e que desenvolvan a súa actividade na comunidade autónoma galega ou fóra de Galicia, pero con claras referencias nos seus contidos e obxectivos á cultura galega.
As modalidades que teñen cabida nesta convocatoria son as que se relacionan co concepto máis tradicional e tamén máis moderno da cultura: artes escénicas, plásticas, audiovisual, etnografía, letras, música, patrimonio histórico e cultural, industrias culturais e creativas, e proxección exterior da cultura galega.
O premio Rodolfo Prada inclúe tres categorías: proxectos culturais promovidos por persoas físicas, tanto profesionais como voluntarias, ou colectivos, cunha achega de 3.000, 2.000 ou 1.000 euros. O premio complétase cunha escultura ou obxecto conmemorativo realizado por artistas ourensáns de recoñecido prestixio, así como un diploma acreditativo. O prazo de presentación de candidaturas rematará o 11 de abril. A decisión do xurado farase pública nos días previos a celebración da Ourense ICC Week 2022, en cuxo transcurso celebrarse o acto de entrega dos premios.
Día Internacional da Muller
A Xunta de Goberno acordou ademais a adhesión da Deputación de Ourense á declaración institucional da FEMP con motivo do Día Internacional da Muller que se celebra mañá martes, 8 de marzo. Un documento no que se incide na necesidade de “salvagardar os logros conseguidos en materia de igualdade de xénero” e incidir na promoción dos mesmos “como unha prioridade en ámbitos estratéxicos co fin de acelerar o progreso cara os Obxectivos de Desenvolvemento Sostible (ODS) da Axenda 2030”.
- Te recomendamos -