Ourense converterase na capital do canto coa celebración do IV Encontro de Coros Infantís, Xuvenís e Escolares

Estudantes de vinte centros educativos da provincia e doutros puntos de Galicia daranse cita no Auditorio municipal entre os días 22 e 24 nunha actividade musical organizada pola Deputación, o Concello de Ourense e maila Xunta de Galicia

Na presentación do evento, o vicepresidente segundo da Deputación, César Fernández, destacou a filosofía dunha actividade “que trata de unir e harmonizar á infancia e á mocidade a través do canto”, subliñando que tamén se promoven valores “como a equidade, a inclusión e a convivencia”

Dirixido polo compositor Josu Elberdin, o encontro inclúe sesións formativas e maila estrea dunha obra composta polo director en base a unha poesía do pedagogo e poeta ourensán Albino Núñez

Ourense, 19 de abril de 2022.- O Pazo Provincial acolleu esta mañá a presentación IV Encontro de Coros Infantís, Xuvenís e Escolares, que do 22 ao 24 de abril converterá a cidade de Ourense na capital do canto reunindo a 400 voces de estudantes pertencentes a 20 centros educativos da provincia, así como invitados procedentes doutros puntos de Galicia. Unha actividade organizada pola Deputación, o Concello de Ourense e maila Xunta de Galicia e que os seus produtores, dado o éxito de participación, non desbotan ampliar para próximas edicións.

Na presentación do encontro participaron o vicepresidente segundo da Deputación, César Fernández; o tenente alcalde do Concello de Ourense, Armando Ojea; a xefa territorial de Cultura, Educación e Universidade da Xunta de Galicia en Ourense, Judith Fernández; e o produtor desta actividade, Carlos Núñez Deza.

César Fernández, que puxo de relevo “a colaboración entre as institucións que arrimamos o ombreiro para que este evento sexa un éxito”, destacou a filosofía dunha actividade  “que trata de unir e harmonizar á infancia e á mocidade a través da música e, nomeadamente, do canto”, subliñando que tamén se promoven valores “como a equidade, a inclusión e a convivencia, pero cunha vertente formativa e educativa moi importante”.

Na mesma liña pronunciouse Armando Ojea, que destacou as oportunidades que ofrece o canto en grupos ou coros “á hora de aprender a solidarizarse, a respectar os demais e a traballar en equipo”. Unha vertente que Judith Fernández ampliou “ao campo da conservación das nosas tradicións e do noso patrimonio cultural a través dunha actividade enriquecedora para os rapaces e rapazas”.

Ourencanto crea tendencia, dixo pola súa banda Carlos Núñez, con actividades semellantes que xa xurdiron en Burgos, en breve tamén en Tenerife e con moitos seguidores a nivel internacional en países de fala hispana e inglesa, “polo que cremos que o obxectivo que mos marcamos cando empezamos a traballar está sobradamente cumprido”.

Carlos Núñez tamén defendeu o canto coral “como unha axuda extraordinaria na formación educativa e cultural, que potencia a capacidade de expresión e a convivencia”, mantendo a súa aposta por conseguir “que cada centro educativo poida chegar a ter o seu propio coro, como ocorre na maioría dos países de Europa que hoxe son punteiros en educación é cultura”.

Baixo a dirección artística do compositor Josu Elberdin, transmitido a través das redes sociais e “con moitas sorpresas”, o encontro inclúe sesións formativas nas xornadas do venres, sábado e domingo, ademais da interpretación de cancións de diversos estilos e a estrea dunha obra composta por Elberdin para Ourencanto, en base a unha poesía do pedagogo e poeta ourensán Albino Núñez.