As Xornadas de Folclore chegan a Celanova e O Carballiño

Ourense, 10 de agosto de 2022.- Celanova e O Carballiño foron escenario esta tarde-noite ante centenares de asistentes do segundo día das Xornadas de Folclore -despois de estar este martes en Bande e A Rúa-, un evento organizado pola Deputación de Ourense e o Centro de Cultura Popular Xaquín Lorenzo co apoio da Xunta de Galicia.

Nesta XXXVII edición, que conta con 200 participantes sumando artistas e o equipo técnico, os asistentes aos concertos que se sucederán polas vilas ourensás poderán gozar con seis estilos folclóricos diferentes entre si, grazas a procedencia global dos grupos participantes.

Hoxe en Celanova, o pavillón das Triguerizas, que reemplazou como sede das Xornadas de Folclore nesta vila ao claustro barroco do mosteiro ante as previsións meteorolóxicas da tarde, acolleu dende as 20,30 horas aos artistas das formacións da compañía internacional de danza Paipa, de Colombia; o grupo de Ballet Folklórico do Instituto Tecnológico de Celaya, de México; e unha compañía de Timor Oriental, integrada por estudantes da Universidade de Coimbra que substitúen no programa ao Ballet Himalaya, de Angola, con problemas burocráticos.

A formación de Timor Oriental realizou un pase de quince minutos, divididos en dous bailes: unha danza tradicional chamada babaok, a ritmo de tambor cónico, e un lafalik. Despois, a formación mexicana realizou dous pases: no primeiro, un baile tradicional que combina fandango, guateque e tarima, e despois, unha danza representativa de Jalisco. Os colombianos  da compañía Paipa tamén realizaron dous pases, facendo unha combinación dos bailes das distintas zonas do país como o bambuco, o rodova -típico da zona de Antioquía-, o nariño -unha danza tradicional campesiña habitual nos carnavais-, unha cumbia e remataron bailando un mapale, con orixe afrocolombiano e orixinario das poboación escravas na época colonial.

Unha vez finalizadas as actuacións en Celanova, o epicentro das Xornada de Folclore pasou ao Carballiño, onde os grupos procedentes de Costa de Marfil, Indonesia e Chile realizaron dende as 22,30 horas dúas mostras dos seus respectivos bailes tradicionais.

A xornada de mañá, xoves 11 de agosto, comezará coa recepción na Deputación, prevista para as 12,00 horas e a tradicional fotografía cunha delegación dos grupos participantes. Xa pola tarde, entre a Praza das Toldas de Maceda (22,30 horas) e o Campo da Barreira de Allariz (23,00 horas) acollerán as seis agrupacións culturais participantes nestas Xornadas de Folclore.