Inicio Destacado Manuel Baltar visita a rodaxe de “Amigos hasta la muerte”, patrocinada pola...

Manuel Baltar visita a rodaxe de “Amigos hasta la muerte”, patrocinada pola Deputación e que ten a Ourense como “cuarto protagonista da película”

O presidente da Deputación felicitou a todo o equipo técnico e artístico e ao director, Javier Veiga, polo “compromiso cun filme que construirá unha fermosa postal de Ourense”. E destacou a aposta do goberno provincial polo sector audiovisual, “nun ano no que fixemos coincidir cinco proxectos gravándose dun xeito simultáneo neste territorio”

Javier Veiga definiu o apoio da Deputación -“foi o noso primeiro apoio, dende o primeiro minuto”- como clave para elixir Ourense, xunto as propias características da cidade e o seu casco histórico: “Estamos moi cómodos rodando aquí, cun contexto ideal e con tantas facilidades para a rodaxe”

A gravación de “Amigos hasta la muerte”, protagonizada por Veiga xunto a Marta Hazas e Mauricio Ochmann, estenderase aproximadamente durante un mes por Ourense, a Vía da Plata e O Grove. E segundo confirmou esta mañá o propio director, terá unha primeira preestrea no Festival de Cine de Ourense

Ourense, 3 de agosto de 2022.- O presidente da Deputación, Manuel Baltar, visitou esta mañá en Ourense a rodaxe de “Amigos hasta la muerte”, película dirixida por Javier Veiga co patrocinio do goberno provincial e protagonizada polo propio Veiga xunto a Marta Hazas e Mauricio Ochmann, ademais de actores galegos como a ourensá Ledicia Sola, Xosé Antonio Touriñán ou David Amor. O filme rodarase en Ourense durante aproximadamente catro semanas, ademais de contar con localizacións en varios puntos da Vía da Plata e no Grove.

Manuel Baltar conversou esta mañá co equipo artístico -entre o que hoxe tamén estaba Xoel López- dunha película que, segundo explicou o propio Javier Veiga, pechará a súa rodaxe en dúas semanas dentro dun cronograma de traballo que incluiría unha primeira preestrea no Festival de Cine de Ourense.

No posterior encontro cos medios de comunicación celebrado no mesmo lugar do rodaxe desta mañá -unha cafetería do casco histórico-, o presidente da Deputación agradeceu o compromiso do director, actores e todo o equipo técnico cunha película que “construirá unha fermosa postal de Ourense” e resaltou que o “cinema é eternidade, e aí estará Ourense, un protagonista máis desta película”.

Manuel Baltar destaca os froitos do traballo do goberno provincial “nun ano no que fixemos coincidir no tempo e espazo ata cinco proxectos audiovisuais rodándose dun xeito simultáneo co patrocinio da Deputación -as películas ‘O home e o can’, ’13 exorcismos’, ‘La manzana de oro’ e ‘Honeymoon’ e a serie ‘Motel Valkirias’-. Un fito completamente histórico, ampliado con “Amigos hasta la muerte” ou ‘El tirabeque’, de Darío Autrán, gravada tamén este verán en Ourense co apoio deste goberno provincial e que se estreará no OUFF”.

Manuel Baltar enmarca este patrocinio de “Amigos hasta la muerte” dentro da “contundente aposta deste goberno provincial pola produción audiovisual. Un proxecto de futuro, a corto, medio e longo prazo, e que ten apoios tan sólidos como a Alta Velocidade, que converteu a Ourense no territorio mellor conectado de Galicia”.

Javier Veiga explicou que elixiron Ourense para a rodaxe da súa primeira película como director por dous motivos: “Porque encaixa moi ben polas súas características físicas e polo apoio da Deputación dende o primeiro momento. Ter todo a favor, contar con este impulso da moitas comodidades. Non é un tema so económico, é poder contar con tantas facilidades para a rodaxe. Estamos moi cómodos aquí, e o primeiro apoio é o da Deputación”.

O actor e director de cine avanzou que Ourense é “o cuarto protagonista de ‘Amigos hasta la muerte’. Creo que estamos retratando esta cidade dun xeito moi fermoso, amosando a parte máis bonita, o casco histórico, que nos está acollendo dun xeito inmellorable”.

Pola súa banda, Marta Hazas destacou que “é un gustazo rodar aquí, descubrir lugares novos de Ourense. Estamos moi cómodos e desexando xa estrear a película” e Mauricio Ochmann felicitou a Javier Veiga polo seu traballo na direción e no guión, prognosticando o éxito da película: “Será un filme de Ourense para o mundo”.

A aposta da Deputación por transformar a Ourense nun gran plató de audiovisual

A rodaxe de “Amigos hasta la muerte” é un novo froito da Deputación dentro da súa aposta polo sector audiovisual, con fitos como o rescate do Festival de Cine Internacional de Ourense, a súa alianza coa Academia Galega do Audiovisual -que celebrará os Mestre Mateo do 2023 en Ourense- ou a recente creación da Ourense Film Commission, unha ferramenta deseñada para mellorar a viabilidade das producións rodadas na provincia mentres se afonda no retorno socioeconómico ao territorio.

Este novo órgano de xestión creado pola Deputación para seguir avanzando no traballo de situar á provincia como un dos mellores destinos de rodaxes -coordinando e atraendo ao territorio todas as producións posibles- será presentado de xeito oficial ao sector audiovisual na próxima edición do OUFF, que se celebrará do 23 de setembro ao 1 de outubro.

Javier Veiga estrease na dirección con esta comedia romántica

“Amigos hasta la muerte” é a primeira película como director de Javier Veiga, un rostro ben coñecido do audiovisual en España. Veiga tamén protagoniza o filme xunto a Marta Hazas e Mauricio Ochmann. Os tres son Suso, María e Nacho, tres amigos que rozan os corenta, cunha longa amizade ás costas e con historias románticas cruzadas.

A película, producida por Medio Limón, Sygnatia, Onírica Films e Ainé e que conta con ser estreada nas salas comerciais no primeiro trimestre do 2023, está baseado na obra de teatro homónima. Escrita, dirixida e protagonizada por Veiga, foi estreada en 2009 e posteriormente en 2012, con dous repartos diferentes sumando máis de 400 representacións. En 2015 estreouse a versión en galego, “Amigos ata a morte”, protagonizada por Xosé Antonio Touriñán, Ledicia Sola e David Amor -os tres presentes na adaptación ao cine- e que xirou por toda Galicia acadando máis de 30.000 espectadores. 


- Te recomendamos -