Despois da clausura en Ribadavia da XXXVII edición, o vicepresidente segundo da Deputación, César Fernández, salienta o “rotundo éxito dunhas xornadas consolidadas coma a cita folclórica estival de referencia en Galicia”
“O resultado é moi satisfactorio”, destaca o director artístico das Xornadas de Folclore, Xulio Fernández
Ourense, 18 de agosto de 2022.- Ribadavia puxo onte á noite punto e final á XXXVII edición das Xornadas de Folclore, un festival organizado pola Deputación de Ourense e o Centro Cultural Xaquín Lorenzo co apoio da Xunta de Galicia. Este festival volveu a situar á provincia de Ourense como punto de encontro da cultura global, con seis formacións procedentes de Chile, Colombia, Costa de Marfil, Indonesia, México e Timor Oriental visitando dezaseis concellos ourensáns: Bande, A Rúa, Carballiño, Celanova, Allariz, Maceda, Manzaneda, Castro Caldelas, Viana, Entrimo, Trives, Xinzo, O Barco, Verín, Ourense e Ribadavia.
A XXXVII edición tamén supuxo a volta á normalidade despois de dous anos de parón debido as restricións sanitarias, sumando en todas as citas unha asistencia masiva, rozando a ocupación plena dos asentos dispostos para o público en cada vila.
Como balance final, o vicepresidente segundo da Deputación, César Fernández, resalta “o rotundo éxito dunha actividade cultural que congrega na provincia de Ourense en agosto un número importante de persoas, que se achegan a coñecer e gozar co folclore dos países invitados”. César Fernández tamén destaca a “resposta masiva dos ourensáns para gozar cun evento que suma trinta e sete edicións e que xa está consolidado como a cita estival folclórica máis importante de Ourense e de Galicia”.
“O resultado é moi satisfactorio, porque a verdade é que estábamos desexosos de poder celebrar de novo este evento”, sinala o director artístico das Xornadas de Folclore, Xulio Fernández, recoñecendo a súa felicidade pola acollida que tiveron durante estes dez días tanto os artistas coma as propias Xornadas, que xa miran cara o ano 2023.
- Te recomendamos -
