Ourense, 2 de setembro de 2022.- O vicepresidente primeiro da Deputación, Rosendo Fernández, recibiu esta mañá no Pazo Provincial ás xogadoras e corpo técnico do C.D. Burela de fútbol sala feminino, que esta fin de semana -3 e 4 de setembro- participa no II Torneo Internacional Ourensanía-Concello de Cartelle, que se disputa no pavillón de deportes Piño Vilachá de Outomuro e no que tamén compiten os equipos Cidade das Burgas, MSC Torreblanca de Melilla e o campión italiano Cittá di Falconara.
No salón de plenos, Rosendo Fernández explicou “a firme aposta que está a desenvolver a Deputación de Ourense polo deporte de alto nivel”, poñendo como exemplo o apoio a esta competición. A capitana, Patricia González “Peque” agradeceu a invitación a coñecer a institución provincial, afirmando que esperan obter un bo resultado “nun lugar talismán para nós como é Ourense”.
- Te recomendamos -