Ourense, 1 de outubro de 2022.- O vicepresidente segundo da Deputación, César Fernández, participou esta mañá dunha nova edición da andaina cultural “Camiño Nós”, un roteiro organizado pola Fundación Insua dos Poetas e patrocinado pola Deputación de Ourense, cuxo fin é poñer en valor a cultura tradicional dos camiños. Na andaina participaron, entre outros, o alcalde do Carballiño, Francisco Fumega, o delegado da Xunta, Gabriel Alén, e o presidente da Fundación Insua dos Poetas, Luis González Tosar.
O punto de partida escollido para este ano situouse no Carballiño, no inmoble da rúa Tomás María Mosquera que acolleu o xa desaparecido Hotel Carlos, onde o 8 de xullo de 1926 pernoitaron os cinco persoeiros da Xeración Nós: Vicente Risco, Ramón Otero Pedrayo, Lois Feixoo, Antón Sánchez e Xavier Pardo. Ás 11.00 horas, minutos antes do inicio da ruta, descubriuse neste punto unha placa conmemorativa sobre o “Camiño de Nós”.
Os participantes na andaina fixeron un percorrido por Ponte Veiga, A Costiña, Barro, o pazo e maila igrexa de Madarnás, A Esgueva e ponte do Eixán, para rematar na Insua dos Poetas.
- Te recomendamos -