Manuel Baltar visitou o concello para manter un encontro de traballo co alcalde, Manuel Seoane, recoñecendo o seu traballo para “convertir á Peroxa nun exemplo de dinamización do rural, con dedicación á xestión municipal as vinte e catro horas do día”
O rexedor agradeceu “o compromiso do presidente da Deputación cun concello de escasos recursos; todos estes proxectos serían imposibles sen a axuda da administración provincial”
A Peroxa é un dos doce concellos ourensáns que recibirán un tractor de roza para a prevención de incendios, no marco do convenio asinado pola Deputación de Ourense, a única das catro galegas, coa Consellería de Medio Rural
A Peroxa, 2 de xuño de 2022.- O presidente da Deputación, Manuel Baltar, e o alcalde da Peroxa, Manuel Seoane, repasaron as liñas de colaboración abertas entre ambas institucións no transcurso da visita que o presidente do goberno provincial realizou esta mañá ao concello. Un encontro de traballo no que tamén estivo presente o concelleiro José Manuel Rodríguez e que se completou cun percorrido por varios espazos do municipio nos que se están a desenvolver actuacións que contan co financiamento da Deputación.
Manuel Baltar detallou entre estes proxectos a renovación da piscina municipal e a humanización de terreos para a construción de vivendas sociais. Esta última actuación conta cun orzamento de máis de 150.000 euros, dos que a Deputación achega o 30% e a Xunta de Galicia o 70% restante.
O presidente do goberno provincial tamén destacou que A Peroxa é un dos doce concellos ourensáns que recibirán este ano un tractor equipado con maquinaria de roza para a prevención de incendios, no marco do convenio asinado pola Deputación de Ourense, a única das catro galegas, coa Consellería de Medio Rural.
Traballo en clave municipal, provincial e galego
Manuel Baltar puxo énfase no labor dun alcalde “que non só pensa en clave municipal, senón tamén de provincia e de Galicia”. Visitar A Peroxa, asegurou o presidente da Deputación, “é aprender dun dos 23 alcaldes españois que levan traballando desde o ano 1979 para dar os mellores servizos á veciñanza, que seguro seguirá confiando na súa dedicación á xestión municipal as vinte e catro horas do día”. Este é o camiño, afirmou o presidente, “para converter a un concello como A Peroxa en exemplo de dinamización do rural”.
Pola súa banda, Manuel Seoane agradeceu “o que fixo, fará e seguirá facendo o presidente da Deputación”, subliñando o apoio do goberno provincial a un concello de menos de 2.000 habitantes e con recursos limitados que, ademais, “leva cinco anos cos impostos conxelados”. Todas as actuacións desenvolvidas na Peroxa, engadiu o rexedor, “serían imposibles sen a axuda da Deputación e o compromiso do seu presidente”.
- Te recomendamos -
